April 27, 2013

மெல்லிய வல்லினம்



கால்கள் இரண்டினை 
பிடித்து தூக்குவதன் மூலம் 
எளிதாய் 
துரு பிடித்த 
சதுர கம்பிகள் கொண்ட 
கூண்டில் இருந்து 
கோழிக்கு 
விடுதலை 
கொடுக்கலாம் 

சிறகுகளை அடித்து
தன் இணைக்கோ 
அல்லது 
குஞ்சிற்க்கோ 
தன் பிரிவை 
உணர்த்துவதை 
பொருட்படுத்தாமல் 
அதன் எடையை 
துல்லியமாய் கணிக்கலாம் 

உடலில் இருந்து 
வர மறுக்கும் 
பறக்க உதவாத 
அதன் பக்கவாட்டு 
இறக்கைகளை 
வலுவாக இரு கைகளால் 
பிய்த்து 
எறிந்துவிடலாம் 
அவை அங்கு மேயும் 
நாய் குட்டிகள் 
விளையாடும் 
பொருளாய் மாறும்   

சுகத்தில் அவை 
அலறும் சத்தத்தை 
நிறுத்த 
சிறிது நேரம் 
கொதிக்கும் நீரில் 
மூழ்கி எடுக்கலாம் 
உங்கள் நகம் கூட நீரில் 
படாமல் கவனமாய் 
இருக்கட்டும் 

இனி 
சிரமமின்றி 
ரோமங்கள் அற்ற 
சடலத்தினை 
வெட்டுவதற்க்கு
துவாய் மர  
பலகையின் மீது
கிடத்துவதற்க்கு
முன்பு ஒரு முறை 
உங்கள் கடவுளை 
பிராத்தித்துக் 
கொள்ளுங்கள் 
 
நம்மை நம்பி 
நாம் தூக்கியெறிந்த 
தானியத்தை தின்று 
வெளியேற்றிய 
வையிற்று கறியை 
வைத்துக்கொண்டு 
அது  வெளியேற்றாமல் 
வைத்திருந்த அன்பு 
இருக்கும் 
மூளை பகுதியை 
வெளியே தூக்கி 
எறியவும் 

இதோ அதன் 
வாழ்கை முக்தி 
பெரும் நேரம் 
நன்றாய் சமைத்து 
நாவினில் படும்போது 
அவை உயிருடன் 
வாழ்ந்தவை 
என்பதை 
எளிதாய் 
மறந்துவிடலாம் 
 
பிறந்தவுடன் தாய் 
இறந்த துக்கத்தை 
குஞ்சுகளுக்கு  தராமல்
இருக்க  
அவைகள் பிறக்கும் 
முன்னே கருப்பானதொரு  
கல்லில் போட்டு 
கருவழிக்கலாம் 


புரட்சிகள் புரியவும் 
கருணை காட்டவும் 
கற்புகள் காக்கவும் 
ஆறுதல் கூறவும் 
அரசியல் நாறவும் 
இன்று 
உடலில் போதிய 
போஷாக்கினை 
சேர்த்தாயிற்று 

நிம்மதியாய் 
இருங்கள் !!

April 17, 2013

நேற்று



இன்றோ நாளையோ
திரும்பாத ஒன்று
நேற்று

புன்னகையுடன்
அசைபோடுபவனுக்கு
அழகானது
நேற்று

கண்ணீருடன்
அசைபோடுபவனுக்கு
மனதில் உரமானது
நேற்று

கடந்து போகும்
ஒவ்வொரு நொடியும்
இன்றல்
நேற்று தான்

இன்றே விழித்து
செயல்படுபவன் அறிவான்
நாளையின் நேற்றை
சிறை பிடிக்கும்
சூட்சமம் 

April 14, 2013

சிரிப்பு


ஆக்ரோஷமான 
பேசுக்கு இடையிலும்
சித்திரவதைகள் 
புரியும் போதும் 
முக்கியமாக 
கடத்திய பிறகான 
தொலைபேசி 
உரையாடல் 
முடியும் முன்பும்  
வாய்விட்டு 
பெரியதோர் 
சிரிப்பு 
சிரிபதில்லை 
எந்த ஒரு நிஜ 
வில்லனும் 

இதையும் பார்க்கலாமே...

Related Posts with Thumbnails